الغلابه فى رمضان…الغلابه طول العام

الغلابه فى رمضان…الغلابه طول العام

بقلم / نورا عواجه

حاولت أمسك نفسي كتير أنى مكتبش عن مهزلة الأسعار ال حاصله لكن مقدرتش بعد كام موقف شفتهم بعينى وسمعت عنهم ..يخلوك تبكى بدل الدموع دم ،
الوضع بقي بشع بكل ما تحمل الكلمه من معانى وميرضيش ربنا ومفيش ولا دين ولا مله يرضوا بيه . إحنا بقينا عايشين فى غابه حرفيا القوى يأكل الضعيف
والكبير يأكل الصغير وفى الإخر المواطن الغلبان عديم الحيله هو الضحيه..
ياناس أتقوا ربنا ،
التجار ال عندهم بضاعه متخزنه وبسعر أقل وبيبعوها بزياده سواء سلع تموينيه أو ملابس أو مفروشات أو أدوات كهربائيه أتقوا الله .. كل حاجه زادت إلا المرتب طيب الزياده دى إحنا نجيبها منين . إفتكروا الناس ال رزقها يوم بيوم وممكن تقعد بالأسبوع والشهر من غير شغل . إفتكروا البيوت ال إتقفلت من أزمة كورونا ورجالتهم قاعده من غير شغل لحد دلوقتى .
بصوا على محاكم الإسره فيها كام قضيه بسبب أن الزوج مش بيصرف على بيته مش بمزاجه ، ده غصب عنه . وكام ست سابت بيتهاورجعت بيت أهلها بسبب قلة الفلوس . أتقوا الله يا كل واحد قادر تبيع بجنيه أقل ومابتبيعش .
أتقوا الله يا كل واحد قادر تساعد غيرك ومبتساعدش ،
أتقوا الله يا كل مسوؤل فى إيدك تساعد الناس وتخفف عنهم ومبتعملش ،
ياناااااااس ياهووووه . الناس ماشيه تكلم نفسها قسما بالله ، يامسوؤلين إنزلوا الأسواق وشوفوا دموع الستات وقهرة الرجاله
ال كل حلمهم يأكلوا أولادهم أى حاجه ومش عارفين .
اللحمه والفراخ والسمك وحتى البيض بقوا حلم ، الدقيق والرز والزيت محدش عارف يشتريهم وإحنا داخلين على شهر كريم ، الخضار ومش هقول الفاكهه لاسمح الله .فاكهه أيه ده حتى يبقي بطر وذنب أن الناس تفكر تاكل فاكهه ،
المواصلات والعيش وحتى ساندوتش الطعميه ال هو أقل حاجه ممكن الواحد ياكلها سعره زاد ،أسعار الإدويه ال ركبت صاروخ ، والجواز للناس ال عوزين يعفوا نفسهم من الحرام بقي كابوس من غلاء الأسعار الجنونى ال مش عارفين واخدنا على فين .
ويقولك ده وضع فى كل العالم بسبب الحرب..حرب أيه هى الحرب فى الشارع ال ورانا ، طيب حتى لو الزياده دى فى كل العالم الزياده بنسبه ١٠ أو ١٥% بالكتير ، إلا مصر ، الزياده فيها 500%
مصر ال الغنى فيها بيزيد غناه والفقير بيزيد فقره ،
لأن الطمع والجشع من أكبر مسوؤل لأصغر مسوؤل هو الغايه والهدف مش مهم على حساب مين وإزاى ،
المهم المكسب . ويغور الغلبان فى مليون داهيه وإيه يعنى كلب ولا يسوى . وينتحر الناس علشان مش لقيين يأكلوا عيالهم . عادى خليه يخف العدد . وحسبنا الله ونعم الوكيل ،
أنا بناشد كل المسؤولين والتجار وإحنا على مشارف شهر كريم أتقوا الله وإفتكروا أنكم هتتحاسبوا قدام ربنا (وقفووهم أنهم مسؤولون )
حالات الإنتحار والسرقه والزنا والطلاق فى زياده مخيفه وكل ده بسبب الأسعار .
الغلابه ياناس أتقوا الله فى الغلابه ،
الغلابه ال موجوده طول السنه مش شهر رمضان وبس . الغلابه ال بتدخل السوق تبكى وتطلع فاضيه مش قادرين على تمن كيلو باذنجان يقلوه لولادهم . على الأقل شهر رمضان فيه خير وتبرعات كتير لكن مابعد رمضان بقي ، الناس هتعمل إيه ؟!
فين الرقابه على التجارال بيزودوا بمزاجهم ولا خايفين من ربنا ولاخايفين من حد ،
مش بس التجار الدكاتره والمدرسين واصحاب المحلات كل واحد عايش فى وضع معين مش عاوز يتنازل عنه أبدا وبرضوا على حساب الغلابه ،
ومحدش خايف لأن كلها سلسلة مصالح مربوطه فى بعض ،
وبناشد الغلابه إل أنا منهم قدم شكوتك لله الذى لايغفل ولاينام ،
وإياك تتفرج على التليفزيون فى رمضان أحسن تموت بالسكته القلبيه من كتر الحزن والقهر ال بتشوفه فى إعلانات الفيلات والكومبوند وأنت عايش تحت الارض ، أو وأنت بتتفرج على مسلسلات كلها سفاله وإنحلال وقلة أدب وكل هدفها يبعدوك عن دينك وقيمك ومبادئك ،
المسلسلات دى هدفها الأول والأخير أنهم يلهوك ياغلبان أنك تفكر فى عيشتك وفى نفس الوقت هم برضوا يستفيدوا من نسبة المشاهده ، وبعدها يقبضوا ملايين وانت مش لاقي تاكل ، أوعى تسمع البرامج ال يطلعلك فيها مذيع يقولك تقشفوا وهو لابس ساعه بمليون دولار والتانى يقولك اصبروا وهو بيفطر بفخده ضانى ، أوعى تسمع واحده ساكنه فى قصر تقولك أننا بنحقد عليهم وعلى مستواهم ونسيت أنهم هم السبب فى الحقد ده ، وواحده تقولك ربنا هيحاسبكوا على واحده الرز بتخاطب الغلابه . طيب وأنتوا الممثلين والإعلاميين معفيين من الحساب ولا إيه ؟!
فى سؤال محيرنى هى الدوله مش بتفرض ضرائب على الممثلين والمذيعين ال بيقبضوا بالملايين ليه ، مش كفايه أستفزازهم للغلابه بتصريحاتهم ال تحرق الدم وتعلى الضغط ،
الغلابه ال فى كل الحالات هم كبش الفداء ، الغلابه ال عملوهم شاورمه
طول الوقت وشهم للنار وضهرهم للسكين وبيلفوا على سيخ محمى وبيقطعوا من لحمهم وفى الإخر يأكلوهم ،
وأنا لله وانا إليه راجعون ،
الا قد بلغت اللهم فاشهد ،